Sunday, 27 February 2011

నీ ప్రేమే గొప్పది

నువ్వు అబద్దం చెప్పే ప్రతిసారి నిజమని  నమ్ముతాను
నే నిజం చెప్పే ప్రతిసారి నువ్వు అపనమ్మకంగా చూస్తావు 

అయినా నీ ప్రేమే గొప్పది

నీ ప్రేమ నాలో నమ్మకాన్ని పెంచితే
నా ప్రేమ నీ లోని అపనమ్మకాన్ని త్రుంచలేకపోతుంది .
  

Saturday, 26 February 2011

ఆ రోజు

హఠాత్తుగా మెలుకువ వచ్చింది.కిటికీ నుండి బయటకు చూసాను.చీకట్లు అప్పుడే తొలగుతున్నాయి.కంగారుగా  టైం చూసాను .పావుతక్కువ ఆరు.ఒక్కసారిగా నిద్ర మత్తు విడిపోయింది . ఈ రోజు ప్రొద్దున్న 7.30 కు ఫ్రెండ్ పెళ్ళి . వెళ్ళడానికే అరగంట పైనే  పడుతుంది .
అంత మొద్దు నిద్రకు తిట్టుకుంటూ బ్రెష్ తీసుకుని పరుగులు పెట్టాను .అమ్మ పంపు దగ్గర నీళ్ళు పడుతుంది . బ్రెష్ చేస్తున్న నన్ను విచిత్రంగా చూసింది.చూడదూ మరి! ఎట్టి పరిస్థితుల్లోనూ ఎనిమిదికి ముందు ఏ రోజూ నాకు తెల్లారదు .రెండే నిమిషాల్లో ముగించి స్నానానికి బాత్ రూం లో దూరాను.చలిగాలిలో చల్ల నీళ్ళేంటీ అమ్మ తిట్లు వినబడుతున్నాయి.నాకూ ఏడుపొస్తుంది కాని టైం లేదే ?దేవుడా దేవుడా అనుకుంటూ ముగించి అంతకు ముందు ఐరెన్ చేయించి పెట్టుకున్న చీర తీసాను .
ఇప్పుడు అదెందుకూ ????అమ్మ ప్రశ్నలు మళ్ళీ మొదలు. ఎన్ని సార్లు చెప్పినా అదే పాట పాడుతుంది.ఎక్కడికీ పంపదు.సమాధానం చెప్పకుండానే తయారయిపోయాను అయిదు నిమిషాల్లో .గభ గభా చెప్పుల స్టాండ్  దగ్గరకు వెళుతూ అమ్మా వెళ్ళొస్తా అన్నాను.ఎన్ని సార్లు అడిగినా సమాధానం చెప్పవేంటీ ఎక్కడికీ ???అమ్మ రెట్టించింది.
ఎన్ని సార్లు చెప్పాలి ఫ్రెండ్ పెళ్ళి అని.మొన్నటి నుండి చెప్తునే ఉన్నానుగా లేట్ అయిన కోపం అమ్మ మీద చూపిస్తూ అరిచాను.రేపన్నావు ?అమ్మ అనుమానంగా చూసింది.ష్ దేవుడా గొణుక్కుని ఈ రోజే అమ్మా అన్నాను విసుగ్గా .ప్రొద్దున్న అన్నావ్ అమ్మ మళ్ళీ అడిగింది . అవును ప్రొద్దున్నే .సమయం ఏడుగంటల ముప్పై నిమిషాలకి ఇంకో అరగంట ఇలాగే ప్రశ్నలు వేస్తే పెళ్ళి అయిపోతుంది అన్నాను కోపం గా .
అప్పటికి అమ్మకు విషయం అర్ధం అయింది .ఇప్పుడు టైమెంతో తెలుసా అంది నవ్వుతూ .ఆరున్నర అన్నాను .అవును ఆరున్నరే కాని పగలు కాదు రాత్రి .నువ్వు మధ్యహ్నం నిద్ర చేసావ్ అంది .
ఈ రోజు ఆ ఫ్రెండ్ పెళ్ళిరోజు .పాత విషయాలు తవ్వుకున్నాం . 

Friday, 25 February 2011

పోకిరీ మగవాళ్ళు

మొదటి సారి  సినిమాహాలు దగ్గర నన్ను చూసి నవ్వినపుడు  పరాకులో పట్టించుకోలేదు 

మొన్న బస్ లో  నే దిగే స్టాపువరకూ  వెంటపడి వచ్చినపుడు  చిరాకుగా చూసాను

నిన్న గుడిలో నా వెనుకనే  ప్రదక్షిణాలు చేసినపుడు అక్క చెల్లెళ్ళు లేరా నీకని  గొణుక్కున్నా

 ఈ రోజు ఇంకా రాలేదెందుకనో  ???ఉఫ్.. .....ఓ పద్దతి పాడు తెలియని పోకిరీ మగవాళ్ళు

నిద్రొచ్చేస్తుంది ప్రియా నీ సమక్షం లో

నీ ఒడే ఊయలగా
నీ ఊపిరి వింజామరగా
యద సవ్వడి జోల పాటగా
బిగి కౌగిలి నులి వెచ్చగా
నీ ప్రేమ లో నిచ్చింతగా
నిద్రొచ్చేస్తుంది    ప్రియా నీ సమక్షం లో

Thursday, 24 February 2011

పత్ర విలాపం













ఆకలేసే వేళ అరటి ఆకును
తాంబూల సేవనలో తమలపాకును

ఆరోగ్యాన్ని ఇచ్చే ఆకుకూరను
మండుటెండను మరిపించే విసనకర్రను

పూజ చేయి వేళ బిల్వ ఆకును
పూజలందుకునే వేళ తులసి ఆకును

తలదాచుకోనేందుకు తాటి ఆకును
పవళించే వేళ   కొబ్బరాకును

ఔషధాలలో పనికొచ్చే వేప ఆకును
పరిమళానికి సాటి లేని మరువపాకును

పండగ కళ  తెచ్చే మామిడాకును
పండిన చేతులకు గోరింటాకును

రంగులో ,రూపం లో ,సొగసులో,హొయలు లో
నా వెనుక పుట్టిన పూబాలల   కన్నా
ఎందులో తక్కువ? నేనే కదా మిన్న?

ఇంతులకు   నేనంటే ఎందుకంత   చిన్న చూపు 
పుష్పాల పై నేమో తరగని వింత కైపు

Wednesday, 23 February 2011

ఎలా నమ్మేది ?

"నాకు చదువంటే చాలా ఇష్టం అండి,బాగా చదువుతాను కూడా .కానీ కానీ నా పేదరికం నాకో  శాపం"  అతను అటు తిరిగాడు  కళ్ళ లో నీరు కనబడకుండా . మా క్లాస్ రూం లో సూది వేస్తే వినిబడేఅంత నిశ్శబ్దం.అందరం జాలిగా చూసాం. ఈ సంవత్సరం తో చదువు పూర్తి అవుతుంది.అన్ని దానాల లో కంటే విధ్యా  దానం గొప్పది  మీరు పెద్ద మనసు చేసుకుంటే!!!! అతను అడగడానికి సిగ్గు పడుతూ ఆగాడు.మాట పూర్తి కాక మునుపే అందరం అపర దాన కర్ణికల్లా  విరివిగా దానం చేసాము.

ఆ తరువాత మూడేళ్ళ తరువాత ఫ్రెండ్ చెల్లెను కలవడానికని వెళ్లి తన క్లాస్ రూం లోనే వెనుక బెంచ్లో కూర్చుంటే అదే వ్యక్తి   చెప్పడం మొదలుపెట్టాడు.
"నాకు చదువంటే చాలా ఇష్టం అండి,బాగా చదువుతాను కూడా .కానీ కానీ నా పేదరికం నాకో  శాపం"  అతను అటు తిరిగాడు  కళ్ళ లో నీరు కనబడకుండా . ఆ  క్లాస్ రూం లో సూది వేస్తే వినిబడేఅంత నిశ్శబ్దం.అందరూ  జాలిగా చూసారు . ఈ సంవత్సరం తో చదువు పూర్తి అవుతుంది.అన్ని దానాల లో కంటే విధ్యా  దానం గొప్పది  మీరు పెద్ద మనసు చేసుకుంటే!!!! అతను అడగడానికి సిగ్గు పడుతూ ఆగాడు.

అప్పట్లో అతను వెళ్ళిపోగానే రెండు రోజులు తీవ్రంగా బాధ పడ్డాను ,పాపం ఇలాంటి వాళ్ళను దేవుడు ఎందుకు కష్టపెడతాడు ?అని .ఇలా మోసం చేస్తున్నాడు అని తెలియగానే బాధగా  అనిపించింది .

ఆ తరువాతోసారి గుడి దగ్గర ఒక ఆమె పెద్దగా ఏడుస్తుంది. ఎవరో బస్ లో మత్తు కలిపిన ఫ్రూటి ఇచ్చి  ఆమె పర్స్,బేగ్,చేతి గాజులు  దొంగిలించారట .ఇంటికి వెళ్ళడానికి డబ్బులు లేవు .ఆకలేస్తుంది సహాయం చేయండి అని అర్ధిస్తుంది.అందరూ వింటున్నారుగాని ఎవరూ సహాయానికి ముందుకు రావడం లేదు.నాకూ అర్జెంట్  పని ఉంది .అందులోనూ ఇలాంటి వారు నిజమో అబద్దమో తెలియదు . సహాయం చేయగలిగే శక్తి ఉండి కూడా ఏదైనా తినమని పది రూపాయలు చేతిలో పెట్టి వచ్చేసాను. అప్పటి నుండి ఎక్కడికన్నా ఒంటరిగా వెళ్లినపుడల్లా  ఆమె గుర్తు వస్తుంది.ఒకవేళ ఆమె చెప్పేది నిజమైతే ?? ఎంత ఘోరమైన పరిస్థితిలో ఆమెను వదిలేసాను అనిపిస్తుంది ..

ఎవరిని నమ్మాలో ఎవరిని నమ్మకూడదో తెలియని రోజులు .  

Tuesday, 22 February 2011

ఈ రోజంతా నీ ఆలోచనలే .......

ఈ రోజంతా  నీ ఆలోచనలే ...

అప్పట్లో నీ సానిహిత్యంలో ఎంతటి ఆనందాన్ని చవిచూసేదాన్నో.ఒక్కోసారి నీ ఒడిలో నేను, మరోసారి నా ఒడిలో నీవు .ఎంత అపురూపమైన రోజులవి ?

ఎంతసేపూ నీ చెంతనే ఉండాలని తెగ ఆరాటపడేదాన్ని.నీనుండి వచ్చే గమ్మత్తైన పరిమళాన్ని ఆస్వాదించాలనుకునేదాన్ని .నువ్వు నాకే సొంతం అనుకునేదాన్ని..ఇంకెవరన్నా నీ గురించి మాట్లాడినా ,నిను తాకినా ఒప్పుకునేదాన్నే కాదు. నా స్నేహితులు ఎంత కుళ్ళుకునేవారు అనుకున్నావ్ నిన్ను చూసి.చాలా గర్వంగా ఉండేదిలే .

కాని ఈ పెద్దోళ్ళు ఉన్నారే దేనికీ ఒప్పుకోరు .అన్నీ ఆంక్షలే . ముఖ్యంగా అమ్మ.మనల్ని విడదీయడానికి శతవిధాలా ప్రయత్నించేది తెలుసా? పగలు నీ దగ్గరకొస్తాను అంటే పని పాటాలేదా క్రొత్త బిక్షగాడు పొద్దు ఎరగడని ఎప్పుడూ అక్కడికే  వెళతానంటావు అని కసిరేది.

పోని మధ్యాహ్నం ఒప్పుకుంటుందా అంటే మరీ తిట్టేది.ఎండాకొండా ఏమీ చూసుకోవా ?నాన్నకు చెప్తాను అని బెదిరించేది.ఇక రాత్రి ,....చీకటి పడింది ఒంటరిగా వద్దు .ఆడపిల్లలు చెప్పిన మాట వినాలి అని గదమాయించేది.

ఇవన్నీ నీకేం తెలుసూ?అందరిని తప్పించుకుని నేను రాగానే చల్లగా నవ్వడం తప్ప.ఒక్కసారైనా నీ కోసం పడే ఆరాటం గమనించావా? ఒక్క రోజన్నా నన్ను తల్చుకున్నావా?' పో' నీతో ఇక మాట్లాడనే మాట్లాడను.

కోపం వచ్చిందా ? నీకు చాలా దూరంగా ఉన్నాను అనే బాధ .అంతే గాని నిన్ను తప్పు పట్టాలని కాదు.నిన్న అమ్మ చెప్పింది నువ్వు ఈ మధ్య చాలా దిగాలుగా ఉంటున్నావంట ?మునుపటిలా లేవంట. ఇదంతా బెంగే ?నా మీదే కదూ?

మళ్ళీ నీ చెంతకు వస్తానుగా ,ఈ సారి ఎవరు చెప్పినా వినను .నీతోనే,నిన్ను చూస్తూ ,నీతో కబుర్లు చెపుతూ నీ దగ్గరే  ఉంటాను .అప్పుడు అలా దిగాలుగా ఉండకూడదు మరి . మునుపటిలా నవ్వుతూ,పచ్చగా ,విరబూసిన మల్లె పూలతో పందిరి అంతా అల్లుకుపోయి  పెరట్లో కళ కళ లాడుతూ ఉండాలి.

ఎవరు కరెక్ట్ ?

ఒకసారి ఫ్రెండ్ తో షాపింగ్ కి వెళ్లాను.అరగంట చూసాకా నాకో డ్రెస్ నచ్చింది పేక్ చేయించుకుని బిల్లు కట్టేసి వచ్చాను.తనది ఇంకా సెలెక్షన్ అవ్వలేదు.మరో పావుగంటకు సేల్స్ గర్లుకు విసుగొచ్చినట్లు ఉంది.అన్నీ అవే కలర్లు అండి .క్రొత్తవేమీ లేవు అనేసింది.  ఇంకో గంటకు షాప్ మొత్తం తిరగేసి మరగేసి మొత్తానికి ఒక డ్రెస్ సెలెక్ట్ చేసింది .

బిల్లు కట్టే సమయానికి తన చూపులు షోకేస్ లో ఒక మూలకున్న డ్రెస్ మీద పడింది .బిల్ ఆపు చేసి ఆ డ్రెస్సులు తీయించింది.షాపువాడు ,సేల్స్ గళ్  కాస్త విస్క్కున్నారు .అరగంటకు ఇంకో డ్రెస్ సెలెక్ట్ చేసుకుంది .నాకు షాపువాడి చిరాకుకు ఇబ్బందిగా అనిపించింది.కాని డ్రెస్ బాగుంది .

మళ్ళీ బిల్లు కట్టే సమయానికి ప్రక్కన మరొక ఆమె సెలెక్ట్ చేసుకున్న డ్రెస్ మీద పడ్డాయి ఫ్రెండ్  చూపులు .బిల్లు ఆపి అటువంటి డ్రేస్స్లు ఉన్న చోటికి వెళ్లి అక్కడో పావుగంట చేసి ఒకటి సెలెక్ట్ చేసుకుంది .కొనే బెరమేనా షాపు వాడు మొహం మీద అన్నాడు.నాకు సిగ్గుతో తల కొట్టినట్లు అనిపించి కొద్దిగా దూరంగా నించున్నాను."ఏంటండీ మీరు ,కొనేటప్పుడు అన్ని చూసి కొనాలి కదా ,ఊరికే ఇవ్వట్లేదుగా!"  ఫ్రెండ్ పట్టించుకోకుండా డ్రెస్ కు బిల్ వేయమంది .ఇదైనా కొంటారా లేక మళ్ళీ మారుస్తారా   వెటకారంగా అన్నాడు షాప్ అతను.ఇద్దరు ముగ్గురు నవ్వారు..నాకు తలకోట్టేసినట్లు అనిపించింది .నా ఫ్రెండ్ పట్టించుకోకుండా బిల్లు కట్టి వచ్చేసింది.

ఎందుకన్ని మార్చడం విసుగ్గా అన్నాను.బోలెడు డబ్బులు పోసి కొన్నపుడు అలా అన్నీ పట్టించుకుంటే తరువాత బాధ పడాలి అంది .తన డ్రెస్ తో పోలిస్తే నా డ్రెస్ ఖరీదు ఎక్కువ ,అంత గొప్పగా అనిపించలేదు .అలా అని షాపులో అలా మాటలు అనిపించుకోవడమూ నచ్చలేదు .వెదవ మొహమాటానికి  పోకుండా ఉంటే నేనూ నచ్చినది కొనుక్కునేదాన్నేమో? కాని అలా ఎప్పటికీ  చేయలేనేమో ?

ఇంతకూ   తను కరెక్టా నేను కరెక్టా?

  

Monday, 21 February 2011

కుచ్చిళ్ళు

చిన్నతనాన  అమ్మ చేతిలో అలోవొకగా ఒదిగిపోతూ ఆక్చర్యాన్ని కలిగించేవి ఈ కుచ్చిళ్ళు

వయసుకొచ్చాకా "అబ్బా ఇంకెలా అత్తా" అని గారాలు ఒలికిస్తూ విసుక్కునేలా చేసేవి ఈ కుచ్చిళ్ళు

పెళ్ళాయ్యాక నునులేత సిగ్గుతో భర్తను వారిస్తూ మైమరపించి  మురిపించేవి  ఈ కుచ్చిళ్ళు

బుడి బుడి నడకలు నేర్చుకుంటున్న బుజ్జిపాపాయి పడిపోకుండా భరోసాను ఇచ్చేవి ఈ కుచ్చిళ్ళు

 అమ్మమ్మ  గంజి పెట్టిన నేత చీరను బుజ్జగింపుల మధ్య మనవరాలితో  సవరించుకునేలా చేసేవి ఈ కుచ్చిళ్ళు

పాదాలను సైతం కనిపించనీయకుండా పడతి అందాన్ని పదిరెట్లు పెంచేవి ఈ కుచ్చిళ్ళు 

Sunday, 20 February 2011

ఏం తినేటట్లు లేవు

ఇంతక ముందోసారి  ఫ్రెండ్ మామిడి తోటకు వెళ్తే మామిడికాయలు  రాసులుగా పోసి ఉన్నాయి.పనివాళ్ళు వాటి పై ఏదో రసాయనాలు పోస్తున్నారు.ఏమిటవి? అని అడగ గానే  కాయలు వెంటనే పండి రసాలుగా తయారవ్వడానికి అట.మేము చూస్తుండగానే పసుపురంగులో మారి పోయి నిగ నిగలాడాయి.

మొన్న ఏదో టివి చానెల్ చూస్తుంటే పచ్చని అరటి పళ్ళపై ఇదే రసానియాన్ని జల్లుతున్నారు వెంటనే మగ్గిపోవడానికి . అలాంటి రసానియాలు జల్లిన పళ్ళు తింటే చాలా జబ్బులు వచ్చే అవకాశం ఉందిట .

డాక్టర్ సలహా మేరకు ఐరన్ బాగా పట్టడానికి అమ్మ రెండు రకాలా ఆకు కూరలు తెచ్చి వండగానే ఇంట్లో వాళ్లకు వాంతులు విరోచనాలు పట్టుకున్నాయి . ఫుడ్ పాయిజన్ అయిందేమో అని మళ్ళీ డాక్టర్ 
 దగ్గరకు పరుగులు పెడితే , ఆకు కూరల పై జల్లిన రసానియాలే కారణం  బాగా ఉప్పు నీటిలో కడిగి తినండి అన్నారు.

పై పై పూతలు అయితే కడిగేస్తాం .నిరంతరం వాటినే పీల్చుకుని ఉన్న వాటిని ఎలా కడిగేది? ఎలా  తినేది?

Saturday, 19 February 2011

నువ్వంటే చిరాకు

చెప్పేది వినడమే కాదు మాట్లాడటం కూడా  చేతకాని నువ్వంటే చిరాకు
నవ్వించడమే కాదు నవ్వడం కూడా రాని నువ్వంటే చిరాకు

వెక్కిరించడమే తప్ప ఓదార్చడం అంటే తెలియని  నువ్వంటే నిజంగా చిరాకు
నువ్వేంటో అర్ధం కావు ఎవరినీ  అర్ధం చేసుకోవు అందుకే మరీ చిరాకు

నీ పొగరు,కోపం,నిర్లక్ష్యం  అన్నీ నాకు చిరాకు చిరాకు చిరాకు

నీ మీద ఇష్టాన్ని చంపుకోవడానికి  ఎన్ని కారణాలు వెతుక్కున్నా
మరింతగా పెరిగిపోతున్న నీ ఆలోచనలు అంటే నాకు చిరాకు పరమ చిరాకు



నా బాల్యం మళ్ళీ తిరిగి వచ్చినట్లు అయింది

మధ్యాహ్నం అంతా నిద్రపోయి చీకట్లు ముసురుతున్నపుడు మెలుకువ వచ్చి,
అది తెల్లవారు జామో లేక సాయం సంధ్యో తెలియని అయోమయం లో బద్దకం గా మరో అరగంట అలాగే పడుకుని,
అమ్మ పెట్టిన వేడి వేడి నీళ్ళు ,పియర్స్ సోప్ ( చిన్నప్పుడు దానితో స్నానం) తో కరువుదీరా స్నానం చేసి..
వదులుగా ఉన్న కాటన్ దుస్తులు ధరించి ,
మేడ మీద చీకట్లో అలా అలా పచార్లు చేస్తుంటే
మళ్ళీ బాల్యం లోకి వెళ్ళిపోయిన అనుభూతి.
ప్రపంచం లో ఆనందం అంతా గుప్పెటలో మూసేసుకున్నట్లు అయ్యింది .
నా భాల్యం మళ్ళీ తిరిగి వచ్చినట్లు అయింది ఆ కొద్ది సేపూ

Friday, 18 February 2011

అలనాటి ఆణిముత్యపు పాటలు

నాన్నమ్మ నేర్పిన ఆణిముత్యపు అలనాటి పాటలు
ఈ పాట ఎవరికైనా తెలిసినట్లు అయితే మిగిలిన పాట తెలుప గలరు

ఎంతా పేదావాడమ్మా గోపాలుడు
ఎంతా పేదా వాడమ్మా
ఎంతా పేదాగాకున్నా అలనాడు కుచేలునిని అటుకులకై చెయ్యి చాపెనే
గోపాలుడు అటుకులకై చెయ్యి చాపెనే " ఎంతా "

కట్టా వస్త్రము లేదు కౌసల్యా కొమరునికి
కట్టా వస్త్రము లేదు కౌసల్యా కొమరునికి

నారా చీరలు కట్టేనే గోపాలుడు
నారా చీరలు కట్టేనే గోపాలుడు "ఎంతా"

పండా పానుపు లేదు యశోదా తనయునికి
పండా పానుపు లేదు యశోదా తనయునికి

పామూ పై పవళించేనే గోపాలుడు "ఎంతా"

మొదటిపోస్ట్

గురు భ్రహ్మ గురుర్విష్ణుః
గురు దేవో మహేశ్వరః
గురుస్సాక్షాత్‌ పరభ్రహ్మ
తస్మై శ్రీ గురవేనమః

శుక్లాం భరధరం విష్ణుం
శశి వర్ణం చతుర్భుజం!
ప్రసన్న వదనం ధ్యాయే
సర్వ విఘ్నోపశాంతయే||